Жарандарга өздөрүнүн кыймылсыз мүлкү менен болгон келишимдерге өз алдынча бөгөт коюу сунушталды

Документтин максаты кыймылсыз мүлккө каттоо аракеттерин жасоого өзүнө-өзү тыюу салуу механизмин киргизүү жолу менен кыймылсыз мүлктүн укук ээси болгон жарандардын укуктарын жана мыйзамдуу кызыкчылыктарын коргоону күчөтүү болуп саналат.

Демилгеге ылайык, менчик ээси өзүнүн мүлкү же анын үлүшү менен кандайдыр бир каттоо операцияларына тыюу салууну ыктыярдуу жана акысыз түрдө орното алат. Мамлекеттик реестрге мындай белги киргизилгенден кийин, кандайдыр бир бүтүмдөр - сатуу, кайра каттоо, - тыюу салууну алдын ала алып салуусуз мүмкүн болбой калат.

Бул эмнеге керек

Бул мыйзам долбоору жарандарды кыймылсыз мүлккө байланышкан алдамчылык аракеттердин көбөйүшүнөн коргоо максатында иштелип чыккан. Психологиялык таасир этүү, алдоо, адаштыруу жана манипуляциялоонун башка ыкмалары аркылуу алдамчылар жарандарды, өзгөчө улгайган курактагы адамдарды - турак жайды сатууга же кыймылсыз мүлккө болгон укугун жоготууга алып келген учурлар көп. 

Натыйжада, бузулган укуктарды калыбына келтирүү узак соттук териштирүүлөрдү, олуттуу чыгымдарды талап кылат, дайыма эле жабырлануучунун абалын толук калыбына келтирүү мүмкүн болбойт.

Механизм кантип иштейт 

Өзүнө-өзү тыюу салуукандайдыр бир алдамчылык схемалардын ишке ашыруу мүмкүнчүлүктөрүн алдын алат. 

• тыюу салуу ээсинин каалоосу боюнча белгиленет; 
• ал бар болгон учурда бардык каттоо аракеттери четке кагылат; 
• тыюу салууну алып салуу арыз берилгенден кийин 24 сааттан кийин гана күчүнө кирет; 
• менчик ээси өзүнүн мүлкү менен аракеттерди жасоо тууралуу билдирүүлөрдү алат.

Бул жарандарга негиздүү чечим кабыл алууга жана жакындары же юристтер менен кеңешүүгө кошумча убакыт берет.

Өзгөчө учурлар

Ошол эле учурда мыйзам долбоору кызыкчылыктардын тең салмактуулугун сактайт жана юридикалык мааниге ээ процедураларга бөгөт койбойт. Өзүнө-өзү тыюу салуу төмөнкү учурларда тоскоол болбойт:

• соттун чечими боюнча;
• аткаруу документтери боюнча;
• мурастоо учурунда;
• техникалык каталарды оңдоо учурунда.

Демилгечинин пикиринде, мыйзамдын кабыл алынышы кыймылсыз мүлк тармагындагы алдамчылык санын төмөндөтөт.

Мыйзам долбоору социалдык багытка ээ жана биринчи кезекте улгайган жарандарды жана башка аярлуу топторду коргоого багытталган.