Экономика министрлиги ишкерлер үчүн салыктык жеңилдиктерди кеңейтүүнү сунуштоодо

Экономика жана коммерция министрлиги салык мыйзамдарына өзгөртүүлөрдү киргизүүнү караган мыйзам долбоорун коомдук талкууга чыгарды. Документ Салык кодексиндеги боштуктарды жана карама-каршылыктарды жоюуга, ошондой эле бизнес үчүн кыйла ыңгайлуу шарттарды түзүүгө багытталган.

Мыйзам долбоорунда бир катар маанилүү өзгөртүүлөр сунушталган:

• автоунаа күйүүчү майы катары колдонулбаган мунай продуктулары менен соода кылган ишкерлер үчүн 0,5% өлчөмүндөгү бирдиктүү салык ставкасын сактап калуу;
• бирдиктүү салык боюнча ишмердүүлүктүн айрым түрлөрүнөн түшкөн кирешеге салык салуунун тартибин өзгөртүү; 
• жеке адам каза болгондо же соттун чечими менен каза болду деп таанылган учурда анын салыктык милдеттенмелерин токтотуу; 
• каптоочу материалдар үчүн табигый таш жана гипс казып алган компаниялар үчүн роялтинин өлчөмүн 3%га чейин төмөндөтүү; 
• Кыргызстандын улуттук паспортторун өндүрүү үчүн чийки зат импорттолгондо аны КНСтен бошотуу;
• тобокелдиктерди башкаруу системасы боюнча эсептелген КНС менен салык салынуучу жеткирүүнүн наркынан эсептелген КНСтин ортосундагы айырманы чыгаша катары эсепке алууга уруксат берүү. 

Мындан тышкары, Экономика министрлиги тигүү жана текстиль тармагындагы ишканаларды, ошондой эле электрондук соода аянтчалары аркылуу иштеген сатуучуларды бирдиктүү салык төлөөдөн бошотууну караган мыйзам долбоорун да иштеп чыгууда.

Жеңилдикти 2026-жылдын 1-августунан 31-декабрына чейин берүү сунушталууда.