Банк эмес финансы-кредиттик уюмдары насыя берүүнү көбөйттү: берилген кредиттердин көлөмү 25%га өстү

Мындай маалымат Кыргыз Республикасынын 2026-жылдын январь-август айларындагы социалдык-экономикалык абалы жөнүндө отчеттон алынды.

Банк эмес финансы-кредит рыногу: 2026-жылдын I жарым жылдыгында республикада 436 банктык эмес финансы-кредиттик уюм жана алардын 438 филиалы иштеген. Аларда эмгектенген кызматкерлердин саны 5,7 миң адамды түзгөн.

Кардарлардын саны: Онлайн-кредиттөө системасынын өнүгүшүнүн натыйжасында июнь айынын аягында кардарлардын (юридикалык жана жеке жактардын) саны 984,3 миңге жеткен. Бул 2025-жылдын 1-июлундагы көрсөткүчкө салыштырмалуу 169,5 миңге же 20,8%га көп.

Кирешелер жана чыгашалар: Январь-июнь айларында аталган уюмдар 12 млрд 606,6 млн сом киреше алышкан. Бул өткөн жылдын I жарым жылдыгына салыштырмалуу 36,2%га көп. Ошол эле мезгилде чыгашалар 32,7%га өсүп, 8 млрд 799,2 млн сомду түзгөн.

I жарым жылдыктын жыйынтыгы боюнча банктык эмес финансы-кредиттик уюмдардын 61%ы 4 млрд 25,4 млн сом пайда тапса, алардын жалпы санынын 17,7%ы чыгымга учураган (218,3 млн сом).

Үстүбүздөгү жылдын I жарым жылдыгында финансылык ишмердүүлүктүн жыйынтыктоочу натыйжасы 3 млрд 807,1 млн сом пайданы түзгөн. Бул өткөн жылдын тиешелүү мезгилиндеги көрсөткүчтөн 45,3%га көп.

Кредиттер: Январь-июнь айларында банктык эмес финансы-кредиттик уюмдар тарабынан берилген кредиттердин көлөмү 58 млрд 836,4 млн сомду түзгөн. Бул өткөн жылдын январь-июнь айларына салыштырмалуу 24,7%га (же 11 млрд 640,1 млн сомго) көп.

Кредиттөөнүн көлөмүнүн өсүшү төмөнкү багыттарда байкалган:

• керектөө максаттарына - 8 млрд 76,6 млн сомго;
• соода тармагына - 1 млрд 471,3 млн сомго;
• айыл чарбага - 1 млрд 26,7 млн сомго.

1-июлга карата кредит портфелдин ачыктыгы 75 млрд 472,9 млн сомду түзгөн. Бул өткөн жылдын ушул күнүнө салыштырмалуу 16 млрд 456,5 млн сомго же 27,9%га көп.

Мында кредит портфелинин түзүмүндө:

• керектөө кредиттери - 46,5%;
• айыл чарбасы - 16,3%;
• соода тармагы - 15,8%ды түзгөн.

Камтуу: Өткөн жылдын ушул мезгилине салыштырмалуу микрокредиттөө менен камтылган калктын саны 2,7 эсеге, ал эми берилген микрокредиттердин көлөмү 20,6%га өскөн.

Кредиттердин жалпы көлөмүнүн 34,6%ы Бишкек шаарынын карыз алуучуларына туура келген. Чүй жана Ош облустарынын үлүшү 13,5%дан, Жалал-Абад облусунуку 12,3%ды, Ысык-Көл облусунуку 7,9%ды түзгөн.

I жарым жылдыкта микрокредиттик уюмдардан 1 млн 559,2 миң адам жалпы суммасы 48 млрд 500,4 млн сом болгон кредиттерди алышкан.

Микрокредиттердин олуттуу бөлүгү Бишкек шаарынын (31,9%), Ош (15,3%), Жалал-Абад (12,9%) жана Чүй (12,6%) облустарынын тургундарына берилген. Ошондой эле микрокредит алуучулардын басымдуу бөлүгү да ушул аймактарга туура келген.

Мөөнөттөрү: Микрокредиттердин негизги бөлүгү төмөнкү мөөнөттөргө берилген:

• 1 жылдан 3 жылга чейин – 15 млрд 619 млн сом (32,2%);
• 3 айга чейин – 13 млрд 033 млн сом (26,9%);
• 6 айдан 12 айга чейин – 11 млрд 619,8 млн сом (24%).

Максаттары: Январь-июнь айларында берилген микрокредиттердин негизги суммасы керектөө муктаждыктарына (61,9%) жана айыл чарба тармагындагы ишмердүүлүктү өнүктүрүүгө (15,7%) багытталган. Соода жана коомдук тамактануу тармагына (11,8%), калкты турмуш-тиричилик жактан тейлөөгө (2,7%), транспорт жана байланыш тармагына (2,1%) берилген микрокредиттердин үлүшү кыйла аз болгон.

Карыздар: 1-июлга карата берилген микрокредиттер боюнча карыздын көлөмү 67 млрд 046,5 млн сомду түзгөн. Анын негизги бөлүгү Бишкек шаарынын (29,5%), ошондой эле Ош (15%), Чүй (14,5%), Жалал-Абад (13%) жана Ысык-Көл (8,6%) облустарынын карыз алуучуларына туура келген.