Кыргызстанда инвесторлорду тартуу үчүн бир катар тоскоолдуктар жоюлат

Документ административдик тоскоолдуктарды кыскартууга, инвестициялык долбоорлорду кароону тездетүүгө жана инвесторлордун укуктарын коргоону күчөтүүгө багытталган.

Долбоорго ылайык, чет өлкөлүк инвесторлорду аккредитациялоо ыктыярдуу жол-жобо катары бекитилиши сунушталууда. Бул колдонуудагы мыйзамдардагы карама-каршылыктарды жоюуга мүмкүндүк берет.

Ошондой эле мамлекеттик органдарга жана жергиликтүү өз алдынча башкаруу органдарына инвесторлордон мамлекеттик мекемелердин карамагында турган документтерди жана маалыматтарды талап кылууга тыюу салуу сунушталууда. Аларды ведомстволор аралык маалыматтык өз ара аракеттенүү аркылуу алуу каралууда.

Өзгөртүүлөрдүн айрымдары инвесторлордун даттанууларын кароого тиешелүү. Ыйгарым укуктуу мамлекеттик органга бул жол-жобону ишке ашыруу үчүн 30 календардык күндөн ашпаган мөөнөт берүү сунушталууда. Өзгөчө учурларда инвесторго себептерин билдирүү менен мөөнөттү эң көп дегенде 15 күнгө узартууга болот.

Мындан тышкары, мыйзам долбоорунда эскертүүлөр жоюлгандан кийин инвестициялык сунуштарды жана долбоорлорду кайра кароонун так мөөнөттөрү белгиленет. Сунуштарды 15 календардык күндүн ичинде, ал эми долбоорлорду 30 күндүн ичинде кароо сунушталууда.

Дагы бир демилге инвестициялык макулдашууларды түзүүгө байланыштуу. Эгерде мамлекеттик органдар макулдашуудан баш тартса, алар конкреттүү себептерди көрсөтүп, мыйзамдардын тиешелүү ченемдерине шилтеме берүүгө милдеттүү болушат.

Сунушталган өзгөртүүлөр инвесторлор үчүн жол-жоболорду ачык-айкын кылып, бюрократияны кыскартат жана инвестициялык долбоорлорду кароонун натыйжалуулугун жогорулатат деп күтүлүүдө.

Эске салсак, 2025-жылдын жыйынтыгы боюнча Кыргызстанга тартылган түз чет өлкөлүк инвестициялардын көлөмү 1 млрд 310,8 млн долларды түзүп, 2024-жылга салыштырмалуу 27,3%га өскөн.